arsacide

Arsacide, m. penacut. Nicole Gilles en la vie de Philippe Dieu donné: En l'an mil cent quatre vingts et treze, apres ladite execution faite par le Roy, il s'en alla à Pontoise, et là luy vindrent nouvelles que le Roy Richard, qui estoit encores outre mer, avoit envoyé un Arsacide par deçà pour le tuer. Il entend un assassin. Car autrement Arsacide, est un surnom dont tous les Rois de Parthie, en faveur et memoire d'Arsaces Roy Parthien, furent appelez, ainsi que Sylves, les Rois d'Albe, et Ptolomées, les Rois d'Egypte. Et que Arsacide soit prins en mauvaise part, la raison peut estre prinse de ce, que comme Strabon recite és livres 11. 12. et 15. de sa Cosmographie, ledit Arsaces Scythien de nation, Roy des Daes appelez Parnes, nation vivant de la picorée, envahist par sur-saut le pays de Parthe, et partie de la Bactriane, emblant sur ses voisins, et vivant de rapt et de grip, hommes de moeurs et conditions Scythiennes et Barbares. Et que pour cette cause au pays d'outre-mer, les matois sont appelez Arsacides, à cause de la vie rapineuse et prompte à toute damnable entre-prinse qu'ils menent, et comme estans meurtriers et assassins à loüage. Qui voudroit tirer Assassin de Arsacide, ils pourroit dire que le changement de r, en s, est frequent, (car on trouve Papirius et Papisius, et on oit dire ma mese, pour ma mere, et bairer pour baiser,) mais il le faudroit escrire, par c. Assacin. Ledit Nicole Gilles en la vie du Roy Saint Loys, se deffait dudit mot Arsacide, en ces termes. L'an mil deux cents trente six, le Roy des Arsacides, nommé le Vau des montagnes, qui habitoit és montagnes d'Antioche et Damas, qui estoit Payen d'outre-mer, envoya en France aucuns de ses Arsacides, qui sont gents nourris et introduits pour tuer ceux que leur Roy leur commande, ayants charge de tuer le Roy Saint Loys. Car autrement Arsacide, comme Josephe le marque au chap. 3. du 18. livr. des Antiquitez, est le sur-nom de ceux qui sont du sang Royal, au pays de Parthie. Et que les Arsacides ayent esté de leur origine de telle vie sanguinaire que dit est, Justin historien au 41. livre le monstre, en ce qu'il dit les Parthes avoir esté les bannis de Scythie, Et qu'en langage Scythique, Parthe signifie Banny.

Thresor de la langue françoyse. Jean Nicot.